Алматы облысының прокуратурасы Талғар ауданында болған ер адамды ату және кішкентай қызды ұрлау оқиғасынан кейін жергілікті полиция қызметкерлерінің әрекетсіздігіне байланысты қылмыстық іс қозғады, деп хабарлайды Aqshamnews.kz тілшісі.
«2025 жылғы 6 қыркүйекте облыс прокуратурасы Талғар ауданының полиция бөліміндегі лауазымды тұлғалардың әрекетсіздігіне (ҚК 370-бабы, 4-бөлігі) қатысты қылмыстық іс тіркеді. Олар күдіктіні дер кезінде қамауға алу шараларын қолданбаған. Соның салдарынан ол Қызыл-Қайрат ауылында ер адамды атып өлтіріп, кәмелетке толмаған қызды ұрлап әкетті», – делінген облыстық прокуратураның баспасөз қызметі таратқан ақпаратта.
Іс арнайы прокурорлардың өндірісіне берілді. Оның тергеуі облыс прокуратурасының ерекше бақылауында болады.
Сонымен қатар, ведомство жалған ақпарат таратқандардың заң алдындағы жауапкершілігін еске салып, тек ресми дереккөздерге сенуге шақырды.
«ҚР Қылмыстық-процестік кодексінің 201-бабына сәйкес, өзге мәліметтер жария етілмейді», – деп толықтырды прокуратура.
Еске салайық, бұған дейін Талғарда ер адамды атып өлтіріп, оның екі жасар қызы ұрланғаны хабарланған еді.