Нұрғиса Тілендиевтің мемориалдық музейінде қазақ руханияты үшін айрықша мәні бар әдеби-сазды кеш өтті. «Талант табыстырған тағдырлар» деп аталған бұл тағылымды шарада қазақ поэзиясының мұзбалағы Мұқағали Мақатаевтың жыр әлемі мен ұлт музыкасының заңғар тұлғасы Нұрғиса Тілендиевтің сазды мұрасы бір арнада тоғысты.
Кештің басты ерекшелігі – поэзия мен музыканың табиғи үйлесімін көрерменге терең сезіндіре білуінде болды. Сахна төрінде Нұрғиса Тілендиев атындағы «Отырар сазы» академиялық фольклорлы-этнографиялық оркестрі өнер көрсетіп, қазақтың төл әуезін асқақтата орындады. Оркестрдің қоңыр үні Мұқағали жырларының ішкі философиясын, жан тербетер сырын айрықша ашып, көрерменді ерекше рухани күйге бөледі.
Әдеби-сазды кеш барысында белгілі өнер иелері – Сауле Жанпейісова, Еркін Құдайберген және Мейірбек Әзімбаев ақын өлеңдеріне жазылған әндерді орындап, Мұқағали поэзиясын жаңа қырынан танытты. Ән мен жырдың тоғысуы, жүректен шыққан сөз бен шынайы әуен көрерменге терең әсер қалдырып, кешке қатысқан қауымды бір сәтке уақыт пен кеңістіктен тыс рухани әлемге жетеледі.
Кеш мазмұнын байыта түскен тағы бір маңызды сәт – Бөлтірік Атыханұлы атындағы №36 гимназия оқушыларының өнері болды. Жас өрендер Мұқағали Мақатаевтың өлеңдерін мәнерлеп оқып, поэзияға деген шынайы құрмет пен сүйіспеншілікті айқын көрсетті. Олардың таза да әсерлі оқуы ақын жырларының мәңгілік екенін, жас ұрпақтың жүрегінен де орын алатынын аңғартты.
«Талант табыстырған тағдырлар» атты бұл әдеби-сазды кеш – тек бір кештік мәдени шара емес, қазақ әдебиеті мен музыкасының өзара байланысын, рухани сабақтастығын танытқан тағылымды кездесу болды. Мұқағали Мақатаевтың жүректен шыққан жырлары мен Нұрғиса Тілендиевтің ғажайып саздары арқылы ұлттық өнердің құдіреті тағы бір мәрте айқындалып, көрерменнің көңілінде ұзақ сақталатын рухани әсер қалдырды.