Жас отбасында бірден үш қыз бала дүниеге келді
Алматы облысында 26 жастағы жас ана үшем дүниеге әкелді. Сәбилердің үшеуі де - қыз бала, деп хабарлайды Almaty-akshamy.kz
Үшемдердің анасы - Көксу ауданының тұрғыны Ардагүл Әскербек. Ол - Талдықорғандағы қоғамдық-саяси «Алатау» газетінің тілшісі. Бұл басылымды белгілі айтыскер ақын Айтақын Бұлғақов басқарады. «26 жастамын.Тұңғышым бес жаста. Бір қызым, екі ұлым бар. Бүгін, міне, үшемнің ата-анасы атанып, 6 балалы болдық. Тәубә, Алланың қалауы. Негізі жолдасым жақтан да, өзім жақтан да тұқымымызда егіз бар. Бірақ үшем жоқ», - дейді журналист, жас босанған ана Ардагүл Әскербек.
Ардагүл бүгін Талдықорған қаласындағы облыстық перинаталдық орталықта таңертең сағат 10:10 шамасында босанған. «Сәбилерімнің жағдайы жақсы. Салмағы - 1900 г, 1800 г және 1700 грамм. Қазір дәрігерлердің бақылауында», - деді жас ана. Шаңырағы шаттыққа бөленіп жатқан жас отбасы ата-анасымен бірге тұрады.
Естеріңізге сала кетейік, бүгін елімізде тағы бір отбасында үшем дүниеге келгенін хабарлаған болатынбыз.