Сингапур Президенті Халима Якоб Күнсұлу Закарияны табысты әйел ретінде мысалға келтірді.
Халима Якоб Қазақстанды әйелдерге тең мүмкіндіктер беру бойынша тәжірибе алмасуға шақырды, деп хабарлайды Almaty-akshamy.kz
«Сингапурда әйелдердің мүмкіндіктерін кеңейтумен өте белсенді айналысамыз. БҰҰ есебіне сәйкес, Сингапур әйелдердің мүмкіндіктерін кеңейту саласында 7-ші орында тұр. Сингапур Парламентінде әйелдердің үлесі 30%-ға жетеді және мұнымен тоқтап қалмаймыз. Біз әйелдердің мемлекеттік құрылым жүйесінде қандай рөл атқаратыны туралы есеп жарияладық және әрқашан инклюзивті қоғамға ұмтыламыз. Ерлер де, әйелдер де – қоғамдастықтың тең мүшелері. Біз серіктестік қатынастарға негізделген осы тәсілді ұстанамыз», - деді Сингапур Президенті Назарбаев университетінде өткен дәрісте.
Сингапур Президенті Қазақстанның теңдік идеясын ілгерілету үшін Орталық Азияда алғаш рет әйелдер мәселелері жөніндегі арнайы орган құрғанын атап өтті.
«Сонымен бірге, Қазақстанда шешім қабылдау процестеріне қатысатын әйелдер саны да артып келеді. Бұл көрсеткіш 2030 жылға қарай арта түседі. Қазақстан әйелдерінің жоғары білімді, жақсы мансап құруға ұмтылатынын білемін. Мысал ретінде Ғылым академиясының президенті Күнсұлу Закарияны айтқым келеді. Қазақстанды әйелдерге осындай мүмкіндік беру саласындағы өз тәжірибесімен бөлісуге шақырамын», - деді Халима Якоб.
Оның айтуынша, тағы бір негізгі бағыт – еңбек нарығындағы тең мүмкіндіктер. Сингапур үкіметі осы тең тәсілге қол жеткізу үшін жұмыс берушілермен, кәсіподақтармен жұмыс істеп жатыр.
«Бұл еңбек нарығы үшін қалыпты нәрсе болуы керек. Ерлер мен әйелдер отбасында жауапкершілікті тең бөліп, еңбек нарығына бірдей қол жеткізуі керек», - деді Сингапур президенті.