Жамбыл облысында сыныптасымен жанжалдасып қалған тоғызыншы сынып оқушысы көз жұмды, деп хабарлайды Аqshamnews.kz тілшісі. Бұл - өңірде бір апта ішінде тіркелген екінші оқушы өлімі.
Оқиға қалай болған?
Әлеуметтік желілерде тараған мәліметке сүйенсек, жанжал мектептің әжетханасында болған. Айтуларынша, оқушының сыныптасы оны кеуде тұсынан ұрып, соққы ауыр жарақатқа әкеліп соққан.
Полицияның ресми мәлімдемесі
Жамбыл облыстық полиция департаменті бұл ақпаратты растады. Қазір аталған дерек бойынша Қылмыстық кодекстің 106-бабы 3-бөлігі ("Басқа адамның дәрменсіз күйін біле тұра немесе оған материалдық не өзге де тәуелділікте болған кезде ауыр зиян келтіру") бойынша сотқа дейінгі тергеу басталды.
"Жедел-іздестіру шаралары барысында күдікті жасөспірім анықталып, уақытша ұстау изоляторына қамалды. Қазіргі уақытта істі жан-жақты, толық және объективті тергеуге бағытталған барлық қажетті тергеу амалдары жүргізіліп жатыр",-деп хабарлады полиция.
Бір аптадағы екінші өлім
Еске салайық, 12 қыркүйекте Жамбыл облысы Шу ауданына қарасты Көкқайнар ауылында футбол матчы кезінде 10-сынып пен 11-сынып оқушылары арасында жанжал шыққан. Жасөспірімдер арасындағы кикілжің кезінде кіші сыныптың бір оқушысы ауыр соққы алып, оқиға орнында көз жұмды.
Оқиға күні полиция 16 және 17 жастағы екі күдіктіні анықтап, ұстаған болатын.