Сыбайлас жемқорлық – заман ағысымен бірге өсіп, бүгінгі күнге дейін жойылмай келе жатқан қоғамның ең қауіпті құбылыстарының бірі. Бұл кесел қоғамға үлкен қауіп төндіреді.
Қазақстан Республикасының «Сыбайлас жемқорлыққа қарсы іс-қимыл туралы» заңы аясында жемқорлықпен күрес әр салада белсенді түрде жүзеге асырылып келеді. Бұл мәселе әсіресе парақорлықпен бетпе-бет келген халық үшін өте өзекті.
Сыбайлас жемқорлыққа қарсы іс-қимылдың негізгі мақсаты – қоғамда бұл құбылысты түбегейлі жою және оның алдын алу. Бұл мақсатқа қол жеткізу үшін келесі шараларды іске асыру маңызды:
- Сыбайлас жемқорлыққа мүлдем төзбеушілік мәдениетін қалыптастыру.
- Сыбайлас жемқорлыққа ықпал ететін себептер мен жағдайларды анықтап, оларды жою.
- Мемлекеттік органдар мен ұйымдардың өзара әрекеттестігін күшейту.
- Халықаралық ынтымақтастықты дамыту және үздік тәжірибелерді енгізу арқылы тиімділікті арттыру.
Бұл шаралар адалдық, ашықтық және әділдік қағидаттарын нығайтуға бағытталған.
Қазақстан Республикасының «Сыбайлас жемқорлыққа қарсы іс-қимыл туралы» заңы сыбайлас жемқорлықпен күресуді барлық мемлекеттік органдар мен онда қызмет ететін лауазымды тұлғалардың міндеті деп бекітеді. Мемлекеттік мекемелер көрсетілетін қызметтер туралы ақпаратты халыққа қолжетімді етіп, ақпараттық стендтерде орналастыруы қажет. Әр азамат сапалы мемлекеттік қызмет алуға құқылы. Сонымен қатар, мекемелерде жұмыс топтары құрылып, сыбайлас жемқорлық тәуекелдерін анықтау және оларды жою жолдарын қарастыру жүйелі түрде жүргізілуі тиіс.
Мемлекеттік қызметкерлердің сыбайлас жемқорлық әрекеттерге бой алдыруының әртүрлі себептері бар. Олардың арасында:
- Кәсіби әдептіліктің жетіспеушілігі.
- Жеке басының қамын бірінші орынға қою.
- Жалақының төмендігі секілді мәселелер кездеседі.
Сондықтан осындай қылмыстардың алдын алу үшін қызметкерлерге құқықтық оқыту шараларын ұйымдастыру, оларды сыбайлас жемқорлық тәуекелдерімен таныстырып отыру қажет.
«Алматы қаласы Наурызбай ауданы әкімі аппараты» КММ 2024 жылға арналған жұмыс жоспары бойынша, мекеме қызметкерлері арасында сыбайлас жемқорлықтың алдын алу мақсатында тұрақты түрде түсіндірме жұмыстары жүргізіліп келеді. Сондай-ақ, мекеме қызметкерлері мүдделер қақтығысының алдын алу үшін сыбайлас жемқорлыққа қарсы іс-қимыл шараларын белсенді түрде жалғастыруда.