Оралдық 12 жастағы Аман Сейфолланы тірідей "жұтып қойған" су соратын қондырғының иесі әлі табылған жоқ, деп хабарлайды аlmaty-akshamy.kz.
Амалы таусылған шенеуніктер қанды құбырдың қожайынын анықтау үшін "Жайық-Каспий бассейні" инспекциясына хат жолдапты. Жеткіншектің құбырға кептетілген денесі Деркөл өзенінен шығарылған болатын. Марқұмның қайғыдан қан жұтқан анасы дәл осы қондырғыдан бес-алты жыл бұрын тағы бір баланың денесі табылғанын айтады.
Су астындағы құбырға жұтылған Аманды құтқарып алуға ұмтылған ересектердің де күші жетпеген. Кейін көмекке келген мамандар құбырды арнайы құрылғымен кесіп, баланың денесін құрсаудан шығарыпты. Бірақ бұл кезде бәрі де кеш еді.
Полиция қылмыстық іс қозғағанымен, адам өлімін жазатайым оқиға ретінде тіркепті.