Солтүстік Қазақстан облысында 13 ауыл ішімдіктен түбегейлі бас тартқан, - деп хабарлайды aqshamnews.kz "Хабар" арнасына сілтеме жасап.
Ішімдіктен бас тартқан ауылдардың бірі – Қазақстан мен Ресей шекарасындағы Сулышоқ ауылы. Мұнда 50-ге жуық үй түтін түтетіп отыр. Қаймағы бұзылмаған ел үлкендердің өсиетін қашанда құп алған.
"Арақ-шарап сатпайтын ауыл болайық деп, байсалды ауыл болайық деп және де тойларда арақ-шарап болмасын деп, жастарға ертең үлгі болсын деп осындай шешім қабылдадық. Игі бастамалар біздің алдымызда облыс бойынша жүріп жатыр ғой. Соларды біз қолдап, қариялар бәріміз ақылдасып, байсалды ауыл болайық дедік", – деді Сулышоқ ауылының тұрғыны Тоқтамыс Жанбүтенов.
Сулышоқ ауылында арақ-шарап сатылмайды. Той-жиындар да ішімдіксіз өтеді. Бұл құқық бұзушылықтардың алдын алуға мүмкіндік берді, дейді тұрғындар. Елді мекенде соңғы жылдары ұрлық-қарлық секілді қылмыстар тыйылған.
"Жастарымыз қазір алкогольдік ішімдіктерді қолданбайды. Және олар көбінесе өзінің қазіргі қазақи тұрғыда, өзі қазақы ауылда тұрғандықтан, өздерінің қазақылықтарын жоғары деңгейде сақтайды. Біздің округтің өзі учаскелік полиция бөлімімен тығыз байланыста жұмыс істейміз", – деді Өспен ауылдық округінің әкімі Сарагүл Бейсенбаева.