Семейде көпқабатты үй подъезінде болған оқиға түсірілген видео бірнеше күннен бері әлеуметтік желіде қызу талқыланып жатыр, деп хабарлайды Aqshamnews.kz тілшісі.
Бейнежазба авторы Аружан есімді бойжеткеннің айтуынша, ол таңғы 04:00 шамасында жұмыстан үйіне оралған. Подъездің кіреберіс есігін аша берген сәтте артынан белгісіз қыз еріп кірген. Подъезге кірер кезде белгісіз қыз ұрыс шығарып, Аружанның бірінші кіргенін талап еткен.
"Түнде мұндай жағдай болады деп ойламадым. Қыз баласы болған соң қорықпаймын деп те ойладым. Алайда оның әрекеті мен агрессиясы шошытты. Менің видеоға түсіріп тұрғанымды көргенде ол басқаша сөйлей бастады. Байқап жүріңіздер", - дейді видеодағы қыз.
Абай облысының полиция департаменті бұл фактіге қатысты тергеуді бастаған.
"Анықталғандай, 2026 жылғы 25 қаңтар күні сағат 03:21 шамасында Семей қаласындағы Қарағайлы ықшам ауданында орналасқан үйлердің бірінің подъезі маңында екі азаматша арасында ауызша жанжал шыққан. Жанжал барысында 24 жастағы бойжеткен бейәдеп сөздер айтып, қоғамдық тәртіпті бұзған. Оқиғаға қатысқан барлық тұлғалар анықталып, түсініктеме алынды. Аталған дерек бойынша 24 жастағы азаматшаға қатысты ұсақ бұзақылық жасағаны үшін әкімшілік іс қозғалды", - делінген хабарламада.
Әлеуметтік желідегі пікірлерде Қарағайлы ауданының тұрғындары бұл қыздың түнгі уақытта подъездерде жүріп, қабаттарды аралайтынын айтып, бұған дейін түсірілген басқа видеоларды да жариялаған. Кей жазбаларда қыздың анасы оның білімді екенін, шетелде оқығанын айтып, «ешқандай ауытқу байқамағанын» жеткізгені де айтылады. Оқырмандар арасында жағдайға алаңдаушылық білдіріп, тиісті органдар тарапынан қосымша тексеру қажет екенін жазғандар бар.