Петропавл қаласында «SARAP» эксперттік клубының «Қоғамдық оптимизм және энергетикалық қауіпсіздік: Қазақстандағы атом энергетикасын дамыту перспективасы» тақырыбындағы аймақтық жиыны өтті, деп хабарлайды aqshamnews.kz.
Жиынды Мәдениет және ақпарат министрлігінің қолдауымен Қазақстандық қоғамдық даму институты ұйымдастырды.
Аймақтық жиын тақырыбына Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауы арқау болды.
Жиын барысында Жолдауда айтылған бірқатар мәселелер: мемлекеттік шешімдер қабылдау процесіне азаматтардың қатысуы, жаңа қоғамдық-саяси мәдениет, экологиялық тәуекел мен қауіпсіздік, сондай-ақ атом электр стансасын салу бойынша жалпыұлттық референдум талқыланды.
Іс-шараға Солтүстік Қазақстан облысының әкімдігі, облыстық және қалалық мәслихат депутаттары, қоғамдық кеңес мүшелері, атом энергиясы мен экология саласының кәсіби мамандары, жастар мен азаматтық қоғам өкілдері қатысты.
Отырыс қорытындысы бойынша сарапшылар нақты мәселелерге тоқталып, ұсыныстарын айтты.