Қазақстанның көрнекті жазушысы, кинодраматург, Қазақстанның еңбек сіңірген қайраткері Смағұл Елубай жаңа конституцияның күшіне енуін елдің алдағы дамуын айқындайтын маңызды тарихи оқиға деп бағалады, – деп хабарлайды aqshamnews.kz тілшісі.
Оның айтуынша, қазақ халқының тарихында негізгі заңдар мен құқықтық қағидалар көбіне «жол» ұғымымен байланысқан. Оған дәлел ретінде «Қасым ханның қасқа жолын», «Есім ханның ескі жолы» мен Тәуке ханның «Жеті жарғысы» сияқты тарихи құқықтық мұраларды атауға болады.
«Ата-бабаларымыз заңды бекерден-бекер жол деп атамаған. Өйткені таңдаған жол халықты не мұратына жеткізеді, не кері кетіреді. Бүгін Қазақстан да дамудың жаңа жолын таңдады, жаңа конституция әр азамат пен тұтас мемлекет үшін тура сондай жолға айналды», – дейді Смағұл Елубай.
Жазушы жаңартылған заң әділетті Қазақстанды құрып, ұлтты ұйыстырып, көздеген мақсатқа қол жеткізетін сара жолға айналарына сенім білдірді.