Олжас Бектенов отандық өндірушілерді қолдау шараларын күшейту жөнінде кеңес өткізді
Премьер-министр Олжас Бектенов Мемлекет басшысының тапсырмасы бойынша отандық кәсіпкерлерге арналған мемлекеттік қолдау шараларының ашықтығы мен тиімділігін арттыру мәселесін талқылау мақсатында жұмыс кеңесін өткізді.
Негізгі мақсат — мемлекеттік сатып алулар мен қолдау шараларына басым қолжетімділік алатын кәсіпорындарды санаттарға бөлу әдістемесін цифрландыру. Бұл мемлекеттік қолдау алған кәсіпорындардың міндеттемелерін нақтылауға мүмкіндік береді. Сондай-ақ өнімнің сапасы, өндірісті локализациялау, қазақстандық қамту үлесі мен кәсіпорынның аймақ пен ел экономикасына қосқан үлесі ескеріледі. Цифрлық формат жемқорлық тәуекелдерін төмендетіп, адами фактордың әсерін жояды.
Қазіргі таңда Үкімет мемлекеттік қолдау шараларының өнеркәсіп саласын дамытуға әсерін кең көлемде талдап жатыр. Жаңа ақпараттық платформа кәсіпкерлік белсенділікті қолдау шараларын алғанға дейінгі және кейінгі динамикада көрсетеді.
Платформада отандық кәсіпорындар туралы мәліметтер, өндірістік жүктемелері, өнім түрлері, сыртқы сауда қызметі, қызметкерлер саны, сондай-ақ ұзақ мерзімді келісімшарттар туралы ақпарат сақталады. Бұл жүйе мемлекеттік органдарға проактивті түрде мониторинг жүргізуге, талдау жасауға және бизнеске қолдау көрсету үшін шешім қабылдауға көмектеседі.
Өнеркәсіп және құрылыс министрі Қанат Шарлапаев платформаның 2 мыңнан астам кәсіпорынның деректер базасын қамтитынын, сондай-ақ реттелетін сатып алулар субъектілерінің мәліметтерін қамтитынын хабарлады. Бұл база жер қойнауын пайдаланушылар мен бизнес арасындағы ұзақ мерзімді шарттар туралы ақпаратпен толықтырылған.
Smart Data Ukimet негізінде құрылған бұл платформа әртүрлі ақпараттық жүйелерден алынған мәліметтерді біріктіріп, жүйелеуді қамтамасыз етеді. Ол Қаржы, Еңбек және әлеуметтік қорғау министрліктерінің, СК-Фармация, «Самұрық-Қазына Келісімшарт», Mitwork және NadLock жүйелерімен толық интеграцияланған. Сонымен қатар «Даму» кәсіпкерлікті дамыту қоры мен «Бәйтерек» холдингінің қолдау шаралары туралы мәліметтер жүктелген. Ақпарат автоматты түрде жаңартылып отырады.
Цифрлық даму, инновациялар және аэроғарыш өнеркәсібі, денсаулық сақтау және Қаржы министрліктерінің өкілдері платформаны толтыру және қолдану бойынша атқарылған жұмыстарды баяндады.