Шымкентте цифрлық технологияның көмегімен білім саласындағы бірқатар былықтың беті ашылды, деп хабарлайды aqshamnews.kz тілшісі.
Мектептерді тексеру кезінде бір мұғалімге 70 сағат жүктеме беріліп, ал енді бірінің бірден екі басшылық қызмет атқарғаны белгілі болды. Ол аз десеңіз, бір мектеп 70 балта сатып алған. Ал өзгесі үш есепшіге 55 калькулятор тапсырыс берген.
Әлеуметтік көмектің қайта қаралуы
Мұнымен қоса, әлеуметтік көмектің де кімдерге тағайындалғаны қайта қаралды. Нәтижесінде жәрдемақы алып отырған кей отбасылардың жеке дүкені, жері және бірнеше көлігі бары анықталған. Ал өзін жағдайы төмен отбасы ретінде көрсеткендердің кейбірі оны растайтын құжаттарын ұсына алмапты. Осылайша ақылды жүйе бюджеттің миллиардтаған теңгесін үнемдеген.
«Әрине, олар тиісті жазасын алды, келтірілген шығынның орнын толтырып, қаражатты қайтарды. Бұл жерде цифрландырудың көмегі көп болды. Тек өткен жылдың өзінде 10 миллиард 200 миллион теңге үнемдедік. Ал бүгінде үнемделген қаражат көлемі шамамен 15 миллиард теңгеге жетті. Менің ойымша, жыл соңына дейін оның көлемі бұдан да арта түседі», – деді қала әкімінің орынбасары Сәрсен Құранбек.
Оқи отырыңыз: Дубайға конкурсқа апарамын: Астанада бір топ ата-ананы алдаған ер адам ұсталды