«Тараз» футбол клубы U-19 жасқа дейінгі Қазақстан жасөспірімдер құрамасының қақпашысы Шерхан Қалмырзаны өз сапына қосуды жоспарлап отыр, деп хабарлайды Aqshamnews.kz тілшісі.
Клуб директоры Дидар Сыдықбектің айтуынша, алдағы күндері алматылық «Қайрат» клубына ресми ұсыныс жолданып, келіссөздер басталмақ.
"Біз Шерхан Қалмырзаға қызығушылық танытып отырмыз. Ертең ресми ұсыныс жасап, келіссөздерді бастаймыз. Ол – Жамбыл облысының тумасы", – деді клуб басшысы.
18 жастағы Шерхан Қалмырза биыл Қазақстан футболындағы ең танымал жас ойыншылардың біріне айналды. Ол Чемпиондар лигасының топтық кезеңінде «Қайрат» сапында негізгі қақпашылар жарақат алған сәтте «Спортингке» (1:4) және «Реал Мадридке» (0:5) қарсы матчтарда алаңға шығып, қақпаны қорғады.
Сонымен қатар, 2025 жылы Қалмырза Қазақстанның жастар құрамасы (U-19) сапында Еуропа чемпионатына іріктеу кезеңінде үш матч өткізген.
Айта кетейік, өткен маусымда Бірінші лигада өнер көрсеткен «Тараз» футбол клубы чемпионатты турнир кестесінің 8-орнында аяқтаған.