2024 жылғы 26 желтоқсанда ҚР Парламенті Сенатының депутаты Нұрия Ниязова өзінің депутаттық сауалында Алматыдағы "Медеу" мұз айдынына Халықаралық конькишілер одағының (ISU) ерекше мәртебесін беру бастамасын ұсынды, деп хабарлайды aqshamnews.kz
Сенатордың пікірінше, "Медеу" мұз айдыны өзінің тарихи маңыздылығын сақтап келеді және қысқы спорт түрлерінің халықаралық аренасында Қазақстанның позициясын нығайта отырып, әлемдік спорт картасына қайта оралуға қабілетті.
Депутаттың пікірінше, "Медеу" тек рекордтар аренасы ғана емес, допты хоккей (бенди) спортын дамытуға арналған маңызды орталыққа айналуы тиіс. Сонымен қатар, мұзды шоулар, мұз үстіндегі жарыстар мен әлем чемпионаттарының кезеңдерін ұйымдастыру арқылы халықаралық қауымдастықтың назарын аударып, елдің туристік тартымдылығын арттыру қажет.
"Медеуді" халықаралық спорт аренасына қайтару – жаңа рекордтарға жол ашып, Қазақстанның қысқы спорттағы имиджін нығайтудың маңызды қадамы", — деп қорытындылады Нұрия Ниязова.