Алматыда өтіп жатқан референдумда Қазақстанның еңбек сіңірген қайраткері, жазушы Сәуле Досжан өз дауысын берді. Ол №112 референдум учаскесіне келіп, ел болашағы үшін маңызды таңдауды жасауға атсалысты.
— Мен бүгін өз азаматтық парызымды орындап, дауыс бердім. Шындығын айтсам, бұл референдум елімізде ең көп талқыланған науқанның бірі болды. Қазір халық өз пікірін еркін білдіруде. Батыс елдерінде жылына 14-16 референдум өтіп жатады екен, бізге бұл таңғаларлық нәрсе болмауы тиіс. Себебі олар әрбір заңды халықтың талқылауына ұсынады, ал халық та ерінбей өз құқығын пайдаланып дауыс береді. Біз де солай жасауымыз керек. Референдумға қатысып, өз пікірімізді білдіру — азаматтық міндетіміз, — деді Сәуле Досжан.
Жазушы бұл референдумның ел үшін маңыздылығын атап өтіп, әрбір қазақстандықты белсенді түрде қатысуға шақырды. Оның айтуынша, халықтың саналы таңдауы еліміздің даму бағытын анықтайды, сондықтан әр азамат өз дауысын беріп, ел болашағына өз үлесін қосуы тиіс.
Алматылықтар таңертеңнен бастап белсенді түрде дауыс беріп жатыр. Қаланың әртүрлі референдум учаскелерінде жоғары белсенділік байқалып, тұрғындар өз таңдауларын жасауға жауапкершілікпен қарауда.