Кеше Астанада күн бұзылып, ірі-ірі бұршақ жауды. Салдарынан көптеген көлік зақымданды. Жауған бұршақ көліктердің әйнектерін тесіп, сыртқы корпусын майыстырып жіберді. Мұндай жағдайда көлік иесі не істеу керек? Заңгер өз кеңесімен бөлісті, деп хабарлайды aqshamnews.kz.
Заңгер Данияр Байғабатовтың айтуынша, мұндай жағдайға тап болған кейбір жүргізушілер шығынның бір бөлігін қайтарып алуы мүмкін.
"Егер көлік құралының меншік иесінде сақтандыру компаниясымен көліктің жағдайына қатысты ерікті сақтандыру шарты жасалса, онда табиғи апаттар салдарынан келтірілген шығын үшін сақтандыру төлемін жүзеге асыру көзделген болса, меншік иесі сақтандыру компаниясына көліктің жағдайына қатысты өтініш жазуы керек. Сонымен қатар, келтірілген шығынға бағалау жүргізуі тиіс. Мұнан кейін компания көлік жағдайына қатысты шешім қабылдап, сақтандыру бойынша төлем төлейді немесе бас тартады", - деп қорытындылады Байғабатов.
Естеріңізге сала кетейік, барлық сақтандыру шарттарында табиғи апаттар салдарынан келтірілген залал үшін сақтандыру төлемін жүзеге асыру көзделмеген.