«AMANAT» партиясы фракциясының жетекшісі Елнұр Бейсенбаев Премьер-Министр Олжас Бектеновқа және Қазақстан Республикасының қаржы нарығын реттеу және дамыту агенттігінің төрайымы Мадина Әбілқасымоваға депутаттық сауал жолдады.
Сауалда автокөлік сақтандыру нарығындағы проблемалық мәселелер көтерілді, деп хабарлайды aqshamnews.kz.
Адамның жол-көлік апатында қаза табуы жағдайында мұрагерлерге сақтандыру сомасы төленбейді. Тек марқұмның асырауында адам болған жағдайда ғана. Ал банк заңнамасына сәйкес, несие борыштары мұрагерлерден алынуы мүмкін, асырауындағы адамдардың бар-жоғына қарамастан.
Баланың жол-көлік апатында қаза болуы да сақтандыру заңнамасында құқықтық салдарға ие емес. Ал жол-көлік апатында қаза тапқан үй жануарларына сақтандыру төлемдері қарастырылған. Яғни, жануарларға төлемдер бар, ал адамдарға жоқ. Бұл әділеттілік және ақыл-ой қағидатына қайшы келеді.
Соңғы жылдары міндетті сақтандыру бойынша максималды төлем сомасы шамамен 2,5 миллион теңге болды. Бұл сома қазіргі жағдайда көліктерді жөндеу және қалпына келтірудің нақты бағаларымен сәйкес келмейді. Мысалы, қымбат автокөліктің бір фарасының құны бірнеше миллион теңге, ал жөндеу бағасы бірнеше есе жоғары. Бұл жағдайда жол-көлік апатына себепкер болған адам қымбат жөндеуді төлей алмайды, бұл оның қаржылық жағдайын нашарлатып, бүкіл отбасының жағдайына да әсер етеді, - деді депутат.
Елнұр Бейсенбаевтың айтуынша, сақтандыру компаниялары өздеріне ыңғайлы жағдайларды лоббилап, бірақ қаржылық қорғау функциясын орындамайды және әлеуметтік жауапкершілік принципін бұзады.