Алматылық жас - Дулат Набиев: «Қаланы тазартуды сөзбен емес, іспен көрсету керек»
Алматыда әлеуметтік желі арқылы пайдалы контент жасап, көпшілікті игі іске үндеп жүрген ерекше жоба бар. Оның авторы – медиа маманы Дулат Набиев. Ол 20 күн бұрын TikTok пен Instagram желілерінде #project_virus_almaty атты экочеллендж бастап, қала тазалығын жақсартуға жеке үлесін қосып келеді.
100 қап пен 3 сыпыртқы: игі істің басы
Дулат өз бастамасын ешкімнің көмегінсіз, қолында бар құралдармен бастап кеткен. Жүз қап пен үш сыпыртқыны алып, қоқыс жиналған аумақтарды тазалауға кіріскен. Ол бұл ісін ешқандай жарнама үшін емес, азаматтық жауапкершілікпен жасап жүр.
«Өзгені өзгерткің келсе, алдымен өзіңнен баста», – дейді ол.
Челлендждің алғашқы аптасы Сайран көлінің айналасында өтті. Қазір бұл бастамаға өз еркімен қосылып жатқан еріктілердің саны күннен-күнге артып келеді.
Қаланың тазалығы – әр адамның мәдениетіне байланысты
Дулаттың айтуынша, қаладағы қоқыс мәселесі тек коммуналдық қызметпен шешілмейді. Бұл – әр адамның ішкі мәдениеті мен жауапкершілігіне тікелей байланысты.
«Қоқыс – тек табиғатқа емес, адамның денсаулығына, психологиясына, эстетикасына да зиян. Адам өзін, қаласын, ортасын сыйласа, мұндай мәселе болмас еді», – дейді ол.
90 күндік челлендж: мақсаты – нәтижеге жету
Бүгін жобаның 18-күні. Дулат пен оның тобындағы 20-ға жуық адам бұл істі кем дегенде 90 күнге дейін жалғастыруды жоспарлап отыр. Егер нәтиже сәтті болса, мұндай экочеллендж басқа қалаларда да жалғасын табуы мүмкін.
Интернеттегі бос контентке – балама ұсыныс
Медиа саласының маманы ретінде Дулат TikTok пен Instagram-да пайдалы әрі мотивациялық контент жасауды қолға алған. Оның TikTok парақшасындағы жазылушылар саны соңғы апталарда 10 мыңнан 30 мыңға дейін көбейген. Instagram-дағы оқырмандары да екі есеге артып, 17 мыңнан асқан.
«TikTok-та бос контент көп. Көпшілігі лайк пен подписка үшін түсіріледі. Бірақ мен оған қарсы пайдалы контент жасап көргім келді. Әрі өзімнің ағам аудиторияң негізінен жастар, оларды жақсы нәрсеге үйрете аласың деп бағыт беріп, жөн сілтеді», – дейді ол.
Бастамаға қолдау артып келеді
Дулаттың бұл жобасы көпшіліктің назарын аударып, ресми органдардан да қолдау тауып отыр. Алматы қаласы Жастар саясаты басқармасы, әкімдік өкілдері, тіпті министрлік деңгейінде де жобаның маңыздылығы қарастырылып жатыр.
Соған қарамастан, Дулат бұл істі ешкімге артып немесе міндеттеп отырған жоқ:
«Мен бұл челленджді ең алдымен өзім үшін бастадым. Көмек көрсеткендерге алғысымды айтамын. Ал көмектеспегендерге ренжімеймін де», – дейді ол.
@project_virus_almaty – пайдалы бастаманың брендіне айналуда
Қазір бұл бастама әлеуметтік желілерде @project_virus_almaty деген атпен танымал болып, көптеген жастарды азаматтық белсенділікке үндеп отыр. Дулаттың мақсаты – өз ісімен көпке үлгі көрсету. Соңғы күндері Дулат пен оның командасы "Алтын Орда" базары маңын тазартуға кіріскен.