26 және 27 қаңтар күндері Алматы қаласында Дүниежүзілік сайлау күніне орай бірқатар іс-шаралар өтті. Екі күн ішінде қаланың аумақтық сайлау комиссиялары әр түрлі форматтағы 16 іс-шара – семинарлар, дәрістер, пікірталастар, дөңгелек үстелдер мен интерактивті кездесулер ұйымдастырып, жалпы саны 825 адамды қамтыды. Оның ішінде 626-сы – жастар.
Барлық іс-шаралар «Электоралды қағидаттар – сайлаушы сенімінің негізі» ұранымен өтіп, заң үстемдігі, сайлау құқығы, азаматтық жауапкершілік және электоралды мәдениетті дамыту мәселелеріне арналды.
Алғашқы күні қаланың барлық аудандарында учаскелік сайлау комиссиялары мүшелерінің құқықтық сауатын арттыруға бағытталған оқыту семинарлары мен дәрістер, сондай-ақ оқушылар мен студенттерге арналған сайлау заңнамасының негіздері және адал әрі ашық сайлау қағидаттары жөніндегі тақырыптық кездесулер өтті.
Екінші күні жастармен жұмыс істеудің интерактивті форматтарына басымдық берілді. Мегаполистің білім беру ұйымдарында қонақ дәрістер, пікірталас, дөңгелек үстелдер және шығармашылық байқаулар ұйымдастырылып, оның барысында қатысушылар жеке таңдаудың маңызын, азаматтық ұстанымды қалыптастыру жолдарын және сайлауға қатысудың ел болашағына ықпалын талқылады.
«Мұндай бастамалар құқықтық сауаттылық деңгейін арттырып қана қоймай, жастармен тұрақты әрі нәтижелі диалог орнатуға мүмкіндік береді, сонымен қатар белсенді әрі саналы болашақ сайлаушылар буынын қалыптастырады», – деп атап өтті Алматы қаласының аумақтық сайлау комиссиясында.
Өткізілген іс-шаралар қатысушылардың құқықтық мәдениетін нығайтуға, азаматтық белсенділікті дамытуға және сайлау үдерісіне жауапкершілікпен қарау көзқарасын қалыптастыруға ықпал етті.