Үндістанда ресейлік блогердің фотосессиясы үлкен дауға ұласты. Қызғылт түске боялған піл көп ұзамай өліп, желіде жануарларды сән мен эстетика үшін пайдалануға қатысты қызу талқы басталды, – деп хабарлайды aqshamnews.kz тілшісі.
Алдын ала мәлімет бойынша, 65 жастағы жануардың өліміне қолданылған бояу құрамындағы уытты заттар мен фотосессия кезіндегі күйзеліс әсер етуі мүмкін. Мамандардың айтуынша, тіпті табиғи деп сипатталатын бояғыштардың өзінде жануар ағзасына зиян келтіретін пигменттер болуы ықтимал.
Ресейлік фотограф Юлия Бурулева фототүсірілімді Үндістанның Джайпур қаласында ұйымдастырған. Ерекше қызғылт реңкті сәулетімен танымал бұл шаһарды жұрт «Қызғылт қала» деп атайды. Фотосессия тұжырымдамасына сай блогер піл мен үндістандық модельді қызғылт түске бояған.
Блогердің өзі жануарға зиянсыз, табиғи бояу қолданғанын мәлімдеді. Соған қарамастан, жергілікті тұрғындар мен әлеуметтік желі қолданушылары бұл әрекетті қатты сынға алды. Олар жануарларды эстетикалық мақсатта пайдалану дұрыс емес екенін айтып, фотографты жауапкершілікке шақырды.