Атом электр станциясын салу бойынша республикалық референдумға алғашқылардың бірі болып Қытайда шетелдік дауыс беру учаскелері ашылды.
Бұл учаскелер Қазақстанның Бейжің, Шанхай және Гонконгтағы дипломатиялық өкілдіктерінің аумағында ұйымдастырылған. №389 референдум учаскесі Қазақстанның Қытайдағы Елшілігінің ғимаратында, Бейжің қаласында орналасқан.
«Референдумға дайындық жұмыстары жүріп жатыр. Дауыс беру күні, орны және уақыты туралы ақпарат таратылды,» - деп хабарлады №389 учаскесіндегі сайлау комиссиясының төрағасы Нұрлан Аққошқаров.
Оның айтуынша, №389 референдум учаскесінде Бейжіңнің жоғары оқу орындарында оқитын студенттер, Қытайда уақытша жұмыс істейтін және тұратын қазақстандық азаматтар, сондай-ақ туристер мен іссапарда жүрген азаматтар дауыс береді деп күтілуде.
Бейжің, Шанхай және Гонконгтағы референдум учаскелері жергілікті уақыт бойынша сағат 7:00-де ашылып, 20:00-де жабылады.