Күні кеше ғана мектеп табалдырығын аттаған бүлдіршіндер алғашқы оқулығы – Әліппемен қоштасуда. Алғашқы ұстазы ұстатқан оқулыққа қимастық сезіледі. Десе де 4 ай көлемінде әріп танып, қалам ұстап үйренген балдырғандарға ол енді тек мәңгілік дос болып қалады да, өз орнын «Ана тілі» оқулығына береді. Сөйтіп, бүлдіршіндердің білім еліне бастаған керуені алға қарай жылжи береді.
Алматының Әуезов ауданына қарасты №202 мектеп-гимназиясының 1 «ә» сынып оқушылары күні кеше ғана «Әліппе» оқулығымен қоштасты. Сынып жетекшісі Ардақ Айдарқызының шебер ұйымдастыруымен өткен кешке мектеп басшылығы, мұғалімдер, ата-аналар қатысты. Тәуелсіздік туралы патриоттық әндерімен көрермен қауымды ерекше сезімге бөлеген 31 бала, енді бір мезетте балалық жаққа жетелеп, ән айтып, би биледі. Ұлдар жағы сыныптағы 21 қызға арнап ән айтса, тағы бір топ оқушы кідірместен түрлі тақпақтар айтып, тәнті етті. «Қара жорға», «Бипыл», «Қарлығаш» билерін тамашалаған көрермен балалардың өнеріне жоғары баға берді.
Әсерлі кешті оқушылардың өздері кезектесіп жүргізіп отырды. Сынып жетекшісі Ардақ Айдарқызының сөзіне сүйенсек, мұндай формат балаларға жауапкершілікті, өзіне деген сенімділікті, сахна мәдениетін үйретеді, аудиториямен жұмыс жасауға баулиды.
Кеш соңында сөз алған мектеп директоры Болат Жанайхан балаларға ақ жол тілеп, Алғыс хаттар табыстады.