«Қазақтелеком» АҚ-да қызметкерлердің жыл сайынғы міндетті мерзімдік медициналық тексеруі басталды. 2026 жылы компанияның шамамен 18 мың қызметкері медициналық тексеруден өтеді. Тексерулер еліміздің барлық өңіріндегі 206 елді-мекенде, оның ішінде ірі қалаларда, аудан орталықтарында және шалғай ауылдарда ұйымдастырылған. Медициналық қызметтің қолжетімділігін қамтамасыз ету үшін үш жылжымалы медициналық кешен жұмылдырылды.
Мерзімдік медициналық тексерулер Қазақстан Республикасының еңбек заңнамасына сәйкес өткізіледі және компаниядағы өндірістік қауіпсіздік пен еңбекті қорғау жүйесінің ажырамас бөлігі болып табылады. Тұрақты тексерулер қызметкерлердің денсаулық жағдайын уақтылы бағалауға, ықтимал қауіптерді анықтауға және қажетті алдын алу шараларын қабылдауға мүмкіндік береді.
«Қызметкерлердің денсаулығына қамқорлық жасау – «Қазақтелеком» АҚ-дағы өндірістік қауіпсіздіктің негізгі қағидаттарының бірі. Біз үшін әрбір қызметкердің жұмыс орны мен өңіріне қарамастан медициналық тексеруден өтуіне мүмкіндік жасау маңызды. Медициналық тексерулерді жүйелі түрде өткізу қызметкерлердің денсаулығын сақтауға және компанияда қауіпсіз еңбек мәдениетін қалыптастыруға ықпал етеді», – деді «Қазақтелеком» АҚ Өндірістік қауіпсіздік дирекциясының директоры Нурия Муфтеева.