Қытай ғалымдары робот кенші жасады. Бұл құрылғы ғарыштан кен іздейді, қазба жұмыстарын жүргізеді, деп хабарлайды aqshamnews.kz 24.kz сілтеме жасап.
Ай мен марс және жердің төңірегіндегі астероидтарды зерттейді. Құрылғы бедері ойлы-қырлы аспан денелерінің бетінде еркін қозғала алады. Ерекшелігі 250 градус температура мен микрогравитациялы ортада жұмыс істей береді.
Жоба авторлары оны ғарыш кеңістігіне барынша жақындатылған зертханада алғашқы сынақтан өткізді. Алайда инженерлер тартылыс күшінің төмендігіне байланысты бірқатар қиындықтарға тап болған.
Лю Синьхуа, Қытайдың Тау ісі және технологиялар университетінің профессоры: - Ең қиыны, бұрғылау жұмыстарын жүргізу болды. Гравитация жоқ кеңістікте салмақ көмектеспейді. Оның үстіне ай топырағы борпылдақ келеді. Робот қалыпты жағдайда тұра алмайды. Бұрғы қозғалып кете береді. Бұл мәселенің шешімін жәндіктерден таптық. Солардың тырнақ құрылымына ұқсас етіп 6 аяқ жасадық. Ол жанасып, қабысуын күшейтуге мүмкіндік берді.