Қытайдың солтүстігіндегі Шаньси провинциясында көмір шахтасында газ жарылып, соңғы дерек бойынша 90 адам қаза тапты, деп хабарлайды Aqshamnews.kz тілшісі.
Оқиға 23 мамыр күні Чанчжи қаласына қарасты Циньюань уезіндегі Люшэньюй көмір шахтасында болған. Жарылыс жергілікті уақыт бойынша 19:29-да, Астана уақытымен 16:29-да тіркелген. Сол сәтте шахта ішінде 247 жұмысшы болған.
Бұған дейін 82 адамның қаза тапқаны және тоғыз кеншінің із-түзсіз жоғалғаны хабарланған еді. Қазір оқиға орнында іздестіру-құтқару жұмыстары жалғасып жатыр. Құзырлы органдар жарылыстың себептерін анықтауда.
«Синьхуа» агенттігінің мәліметінше, апат орнына Қытайдың ұлттық тау-кен құтқару қызметінің алты бригадасы жіберілген. Жалпы 345 құтқарушы қажетті техникамен іздеу жұмыстарына жұмылдырылды.
ҚХР төрағасы Си Цзиньпин құтқару жұмыстарын күшейтіп, жоғалғандарды іздеуге және зардап шеккендерге көмек көрсетуге барлық қажетті шараны қабылдауды тапсырды.