Құрылысшы күні қарсаңында Премьер-министр Олжас Бектенов Мемлекет басшысы Қасым-Жомарт Тоқаевтың атынан құрылыс саласының үздік мамандары мен ардагерлерін құттықтап, мемлекеттік наградалар табыс етті.
Биыл алғаш рет «Қазақстанның еңбек сіңірген құрылысшысы» құрметті атағы ресми марапаттар жүйесіне енгізілді.
Премьер-министр өз сөзінде Мемлекет басшысының Жұмысшы мамандықтары жылын жариялау арқылы еңбек адамының беделін арттыруға ерекше мән беріп отырғанын атап өтті. Құрылыс саласы ЖІӨ-нің 6%-ын құрайды. 2024 жылы 19 млн шаршы метр тұрғын үй пайдалануға беріліп, салада рекордтық көрсеткіш тіркелді.
Биылдың алғашқы жартыжылдығында 120-дан астам мектеп пен балабақша, 30-ға жуық денсаулық сақтау нысаны салынды. Құрылыс жұмыстарының көлемі 18%-ға өскен. Сонымен қатар жаңа құрылыс кодексі әзірленіп, саланы цифрландыру мен кадрлық әлеуетті арттыруға бағытталған.
Марапат алғандар Мемлекет басшысына кәсіби еңбектеріне көрсеткен жоғары бағасы үшін алғыс білдірді.