Үкіметтің жаңа мүшесі – төтенше жағдайлар министрі Мұрат Мұханов ант берді, деп хабарлайды aqshamnews.kz тілшісі.
Қазақстан Республикасының Премьер-министрі Олжас Бектеновтің төрағалығымен Құрылтай сайлауынан кейін жаңартылған құрамда Үкіметтің алғашқы отырысы өтті. «Қазақстан Республикасының Үкіметі туралы» Конституциялық заңға сәйкес, Үкіметтің жаңа мүшесі – төтенше жағдайлар министрі Мұрат Мұханов ант берді.
Олжас Бектенов жаңа Конституция заңды күшіне еніп, мемлекетіміз саяси және экономикалық жаңғыруға қадам басқан тарихи кезеңде еліміздің одан әрі әлеуметтік-экономикалық дамуын қамтамасыз ету үшін жан-жақты шараларды қабылдау қажеттігін айтты.
Премьер-министрдің айтуынша, барлық бағыт пен салалар бойынша Мемлекет басшысы қойған міндеттерді жүйелі әрі кешенді түрде жүзеге асыру қажет.
“Заң мен Тәртіп” және “Таза Қазақстан” конституциялық қағидаттары әрдайым биік тұруы тиіс. Үкіметтің жұмысы кешенді шараларды қабылдай отырып, озық қарқынмен жүруі керек.
«Қазір толық жауапкершілікті мойнымызға алып, нақты нәтижелерге қол жеткізу үшін қажетті шешімдерді жедел қабылдайтын уақыт. Бәріміз Президенттің жоғары сенімін толығымен ақтауымыз керек», — деп атап өтті Олжас Бектенов.