Қостанай облысында екі күннің ішінде екі өрт оқиғасы тіркелді. Соның бірінде ер адамның мәйіті табылған, – деп хабарлайды aqshamnews.kz тілшісі Alau.kz басылымына сілтеме жасап.
21 ақпанда Федоров ауданына қарасты Жаркөл ауылындағы колледж ғимаратынан түтін шыққаны туралы хабар түскен. Өрт екі қабатты зертханалық корпустың бірінші қабатындағы қосалқы бөлмеде болған.
Тексеру кезінде құтқарушылар 1968 жылы туған ер адамды ес-түссіз күйде тауып, сыртқа шығарып, медицина қызметкерлеріне тапсырған. Алайда оны аман алып қалу мүмкін болмаған. Өлімнің нақты себебі сот-медициналық сараптама арқылы анықталады. Өрттің шығу себептері нақтыланып, өрт-техникалық сараптама тағайындалды.
Одан бір күн бұрын Ұзынкөл ауданының Крутоярка ауылында жеке тұрғын үй толықтай жанып кеткен. Оқиға орнына алғаш болып көршілес Пресногорьковка ауылынан ерікті құтқарушылар жеткенімен, сол сәтте үйді от түгел шарпыған.
Куәгерлердің айтуынша, қардан тазартылмаған жол салдарынан үйге жету қиын болған. Олар көшенің қыс бойы тазаланбағанын, бұл өрт сөндіру техникасының дер кезінде келуіне кедергі келтіргенін айтады.
Бұл оқиғада адам шығыны жоқ, бірақ төрт адамнан тұратын отбасы баспанасыз қалды. Өрт толық сөндіріліп, себептері анықталып жатыр.