Қазақстан Жазушылар одағының 90 жылдық мерейтойы салтанатты түрде аталып өтілуде, деп хабарлайды aqshamnews.kz
Алматыда Қазақстан Жазушылар одағының 90 жылдық мерейтойы жоғары деңгейде аталып өтті. Бұл шара қазақ әдебиетінің тарихи маңыздылығын көрсетіп, рухани мұрамызды ұлықтаған айтулы оқиға болды. Жазушылар одағы – қазақ әдебиетінің қара шаңырағы, ұлт руханиятының алтын қазығы.
Қазақстан Республикасының Президенті Қасым-Жомарт Тоқаев мерейтойға орай жолдаған құттықтау хатында ұлттық әдебиеттің қоғам өміріндегі маңыздылығын ерекше атап өтті. Мемлекет басшысы әдебиетті «ойымыздың тереңдігі мен рухымыздың асқақтығын айғақтайтын ұлы қазына» деп сипаттап, оны заман талабына сай дамытуды мемлекет алдында тұрған маңызды міндеттердің бірі деп көрсетті.
Жиын барысында Қырғыз Республикасы Президентінің кеңесшісі Арслан Қойшиев Садыр Жапаровтың құттықтауын жеткізсе, алыс-жақын шетелдерден келген мәдениет және әдебиет қайраткерлері қазақ әдебиетінің баға жетпес мұрасына деген құрметін білдірді.
Қазақстан Жазушылар одағының қазіргі төрағасы Мереке Құлкенов салтанатты шарада қазақ әдебиетінің бүгінгі жаңару үдерісі мен шығармашылықтағы тың серпін туралы баяндама жасады. Ол әдебиет қоғамдағы тұрақтылық пен рухани дамудың басты қозғаушы күші екенін атап өтті.
Ұлт руханиятына өлшеусіз үлес қосқан Жазушылар одағының бұл мерейтойы қазақ қаламгерлерінің бірлігін, әдебиетіміздің әлемдік деңгейдегі орнын айқындады. Ұлттық әдебиет болашақ ұрпаққа мирас болып, жаңаша биіктерге жету жолында дамуын жалғастыра бермек.