Желіде қоғамдық орында аяғын жуып, дәрет алған ер адамның видеосы тарады. ҚМДБ ер адамның әрекетіне пікір білдірді, - деп хабарлайды Аqshamnews.kz тілшісі.
Видеода ер адам дәрет алып, қол жуғышқа аяғын жуғаны бейнеленген. Желі қолданушыларының бірі оның бұл әрекетіне наразылық тудырса, енді бірі қоғамдық орындарды дәрет алатын арнайы орыннынң болмауын жазған.
Қазақстан мұсылмандары діни басқармасы арнайы дәрет алу орындарын қарастыру керегін алға тартты, бұл қоғамдағы түсініспеушілікті азайтады.
"Қазақстан мұсылмандары Діни басқармасы сенушілерді қоршаған ортамызды құрметтеуге, діни рәсімдерді орындау кезінде ерекше ұқыптылық танытуға және тазалықты сақтауға шақырады. Дәрет алу арнайы бөлінген жерлерде, оның ішінде намазханалардың жанында ғана орындалуы тиіс. Мұндай тәсіл айналадағы адамдарға деген құрметті көрсетеді және мұсылмандардың жоғары мәдениеттілігін сақтауға көмектеседі. Сонымен қатар, бізге көптеген намазхана бар жерлерде дәрет алуға арналған арнайы орындардың жоғы белгілі. Осыған орай, халықтың басым бөлігін құрайтын мұсылман қауымының өтініштерін ескере отырып, Қазақстан мұсылмандары Діни басқармасы сауда ойын-сауық орталықтарының басшыларына намазханалары бар ғимараттарда арнайы дәрет алу құрылғыларын орнатуды қарастыруға үндейді", - делінген жауапта.