Су ресурстары және ирригация министрлігінің «Қазсушар» кәсіпорынында 67 сушылар әулеті жұмыс істейді.
Олардың басым бөлігі - 25 әулет Қ.Сәтпаев атындағы каналда еңбек етеді. Жамбыл облыстық филиалда - 19, Түркістан облыстық филиалда - 8, Жетісу облысында - 6, Қызылордада - 3 және Ақтөбе облысында - 2 сушылар әулеті бар. Батыс Қазақстан, Ақмола, Солтүстік Қазақстан және Шығыс Қазақстан облыстарында сушылардың 1 әулетінен бар, деп хабарлайды aqshamnews.kz сала министрлігіне сілтеме жасап.
Ең көп сушы шыққан әулет - Шамшиевтер әулеті. Ақмола облыстық филиалда бір отбасыдан 7 маман жұмыс істеген. Бүгінде аталары бастаған қызметті немерелері жалғастырып келеді.
Көктемгі су тасқыны кезінде көзге түсіп, Мемлекет басшысынан марапат алған Шыңғыстау Әбдиев те сушылар әулетінің негізін салушы. Бүгінде оның інісі мен келіні, баласы Ақтөбе облысы бойынша «Қазсушар» филиалының учаскелерінде жұмыс істейді.
«Біз еліміздің су шаруашылығында қызмет етіп жүрген әулеттерді мақтан тұтамыз және олардың еңбегін жоғары бағалаймыз. Бұл отбасылар өз ісіне адалдығымен жастарға үлгі болып, кәсіби дағдылармен қатар, еліміздің су ресурстарына деген үлкен жауапкершілікті жеткізуде. Әкеден балаға, атадан немересіне жалғасып келе жатқан ұрпақтар сабақтастығы білім мен тәжірибе алмасу үшін де өте маңызды болып табылады»,- деді Су ресурстары және ирригация министрі Нұржан Нұржігітов.