Алматы облысының қылмыстық істер жөніндегі мамандандырылған ауданаралық соты "Қазселденқорғау" мекемесінің бұрынғы басшысы Карим Көкрекбаевқа қатысты үкім шығарды, - деп хабарлайды aqshamnews.kz.
Сот мәліметінше, Көкрекбаев пен оның бұрынғы орынбасары аса ірі көлемде пара алғаны үшін айыпталған. Ал үшінші адам – ЖШС директоры аса ірі көлемде пара бергені және ұрлау мақсатынсыз мүліктік залал келтіргені үшін жауапқа тартылған.
"Сотта К. мен А. қызмет бабында жүрген кезде алдын ала сөз байласып, ЖШС директоры П.-дан орындалған жұмыстар актілерін кедергісіз қол қою үшін аса ірі көлемде пара алғаны анықталды. Сондай-ақ П. іс жүзінде орындалмаған құрылыс-монтаж жұмыстарының актілеріне қол қоюды ұйымдастырған", – делінген сот хабарламасында.
Салдарынан мемлекетке 1 987 827 622,63 теңге көлемінде залал келтірілген.
Алқабилердің үкімімен Көкрекбаев пен оның бұрынғы орынбасары кінәлі деп танылды.
"Сот үкімімен К. 12 жылға бас бостандығынан айырылды, ал А. мен П.-ға 11 жыл жаза тағайындалды. Барлығы өмір бойы мемлекеттік қызметте лауазым атқару құқығынан айырылды", – деп қосты сот өкілдері.
Үкім заңды күшіне енген жоқ.
Еске салайық, Жамбыл облысының экс-әкімі және сол кездегі "Қазселезащита" басшысы Карим Көкрекбаевтың ұсталғаны 2022 жылғы 27 желтоқсанда белгілі болды. Ол кезде Антикор Көкрекбаевтың пара алып жатқан сәтінде ұсталғанын хабарлаған. 2023 жылғы мамырда тергеу органдары бұл істе фигуранттар кәсіпкерлерден орындалған жұмыстар актілерін қол қою мен жалпы қамқорлық үшін жалпы сомасы 396 миллион теңге пара алғанын растаған.