Бас прокуратура Интерполдың Ұлттық орталық бюросымен бірлесіп, Сыртқы істер министрлігінің қолдауымен бірнеше рет алаяқтық жасады деп күдікке ілініп, халықаралық іздеуде жүрген Қазақстан азаматшасын Түркиядан елге қайтарды, деп хабарлайды Аqshamnews.kz тілшісі.
Прокуратура мәліметінше, күдікті 2024 жылы Қызылорда қаласында азаматтарға «арзан бағамен алтын, зергерлік бұйым жеткізіп беремін» деп уәде беріп, алдап кеткен. Соның салдарынан 8 адам жапа шегіп, келтірілген материалдық шығын көлемі шамамен 130 млн теңге болған.
Ақшаны алғаннан кейін әйел шетелге қашып, бой тасалаған. Осыған байланысты полиция оны халықаралық іздеуге жариялаған.
Күдікті Түркия аумағында ұсталып, Қазақстанға экстрадицияланған. Қазіргі уақытта ол тергеу изоляторына қамалды. Прокуратураның ескертуінше, тағылған айыптар бойынша мүлкін тәркілеу және 5 жылдан 10 жылға дейін бас бостандығынан айыру жазасы қарастырылған.