2024 жылдың төртінші тоқсанының қорытындысы бойынша қазақстандықтар орта есеппен әр адамға шаққанда 10,8 кг тәтті өнім тұтынған.
Бұл көрсеткіш 2023 жылдың сәйкес кезеңімен салыстырғанда айтарлықтай өзгермеген – жылдық өсім небәрі 0,4%-ды құрады.
Тұтынылған тәтті өнімдердің ең үлкен бөлігін қант құрады: бір адамға тоқсанына орта есеппен 4,4 кг. Бұл өткен жылғы 4,6 кг көрсеткішпен салыстырғанда 4%-ға азайғанын көрсетеді.
Қазақстандықтар ең көп тұтынатын тәттілер қатарына глазурьмен қапталған шоколад конфеттері (675 г), тосап, джем және повидло (497 г), бал (448 г), мұздатылған тәтті өнімдер (312 г), шоколад (245 г) және рафинад қант (80 г) жатады.
Ауыл тұрғындары қала халқына қарағанда сәл көбірек тәтті тұтынған: орташа есеппен әр адамға 10,9 кг, ал қалалықтарда бұл көрсеткіш 10,7 кг.
Аймақтар бойынша ең жоғары тұтыну деңгейі Ұлытау облысында тіркелген – әр адамға шаққанда 15,7 кг, бұл бір жылда 8,9%-ға артқан. Одан кейін Қарағанды және Жетісу облыстары келеді – әрқайсысында 12,8 кг. Ең төменгі көрсеткіш Атырау облысында байқалған – тұрғындар орта есеппен 8,5 кг тәтті өнім тұтынған.