Қазақстандық суретші Әсем Сүлейменова Лондонда өткен Golden Time Talant халықаралық байқауында Гран-при иеленді. Конкурсқа әлемнің түкпір-түкпірінен барлығы 100-ден астам қатысушы келді, оның ішінде 30-ға жуығы - суретшілер, деп хабарлайды aqshamnews.kz.
Әсем Сүлейменова көрмеге ұлттық нақыш пен заманауи элементтері үйлескен «Қазақ қызы» суретін ұсынды. Талантты суретшінің туындыларында көбінде этникалық композиция кездеседі.
«Мен өте қуаныштымын. Байқауда түрлі таланттар болды. Біраз жақсы суретшілерге қатысқаны үшін алғыс білдірді. Ал мен Гран-при жеңіп алдым. Әзірге алдағы уақытқа нақты жоспар жоқ. Дегенмен Еуропа елдері, сондай-ақ АҚШ сияқты халықаралық деңгейдегі сайыстарға тағы шыққым келеді», - деп Әсем өз әсерімен бөлісті.
Әсем Сүлейменова Golden Time Talant байқауының «Сурет» номинациясында онлайн тәртібінде жеңіске жетіп, Лондонға көрмеге арнайы шақырылған. Былтырғы жылы жазда ол аталмыш конкурсқа «Ана мен бала» атты туындысын жіберген болатын. Додаға 190 туындымен 30-дан астам ел қатысқан еді.
Лондонға сапарын Choco Holding компаниясының басшысы Рамиль Мухоряпов қолдады. Қазақстандық IT-компания Әсем Сүлейменованың бірнеше суретін сатып алып, оған қоса қаржылай көмек көрсетті.
Golden Time Talent – жасөспірімдерден бастап тәжірибелі мамандарға дейінгі адамдарға өз талантын көрсету мүмкіндігін беретін халықаралық жоба.