"ҚазАвтоЖол" ұлттық компаниясы Қазақстанда ауа райы күрт өзгеріп жатқанын еске салды. Бірқатар өңірлерде алғашқы қар түсіп, көктайғақ болатынын ескертті, деп хабарлайды Aqshamnews.kz тілшісі компания дерегіне сілтеме жасап. Осыған байланысты жүргізушілерге көліктерін қысқы маусымға алдын ала дайындау ұсынылды.
Компания мамандарының айтуынша:
"Жолдарда көктайғақ басталады, ал тежелу қашықтығы бірнеше есе артады. Өзіңіздің және айналаңыздағы адамдардың қауіпсіздігін ойлаңыз", - делінген ескертуде.
"ҚазАвтоЖол" жүргізушілерге мынадай кеңес береді:
- Көлікті қысқы дөңгелектерге ауыстыру жолдағы тайғақтан тежейді.
- Тежеу жүйесін, аккумуляторды және жарық құралдарының дұрыстығын тексеру.
- Қысқы отын пайдалануға және антифриз деңгейін бақылауға көңіл бөлу.
- Жылдамдық режимін және қауіпсіз арақашықтықты сақтау, күрт маневрлерден аулақ болу.
"Есіңізде болсын, ауа райын ескермесе, тәжірибелі жүргізушінің өзі қиын жағдайға тап болуы мүмкін. Өз-өзіңізді және жақындарыңызды қорғаңыз. Алда қыс, бәрі сіздің ұқыптылығыңыз бен жауапкершілігіңізге байланысты", - деп атап өтті компания.
Сонымен қатар, жол қызметтері тәулік бойы қозғалыс қауіпсіздігін қамтамасыз етуді жалғастырып жатқаны хабарланды. Сұрақтар туындаған жағдайда жүргізушілер 1403 қысқа нөміріндегі жедел желіге хабарласа алады.