Қазақстандық азамат Ішкі істер министрлігіне интернет пен қоғамда діни радикализм мәселесіне назар аударуды сұрап, петиция жолдады, - деп хабарлайды Аqshamnews.kz тілшісі.
Оның айтуынша, бұл жерде діннің өзіне емес, мемлекетіміздің зайырлы құрылымына, әйелдердің құқығына, жастар мен қоғам қауіпсіздігіне қауіп төндіретін радикал көзқарас жайлы сөз болып отыр.
Петиция авторы қазақстандықтарды осы мәселеге қатысты нақты мысалдар жіберуге шақырады: сілтемелер, скриншоттар, жазбалар, яғни проблеманың бар екенін дәлелдейтін кез келген материал қажет. Қазір ол epetition.kz платформасында петицияны жариялау үшін 50 қол жинауға тиіс.
"Кейбіреулер мені исламға қарсы деп ойлайды. Бұл олай емес. Мен радикализмге, біреуге өз көзқарасын күштеп таңуға, қалай өмір сүру керегін, не ішу, не көру керегін айтуға қарсымын. Біз зайырлы елде өмір сүріп жатырмыз, әр адамның таңдау еркіндігі мен ар-ождан бостандығына құқығы бар", – дейді ол.
Петиция авторына пікір жазғандар оған қолдау білдіріп жатыр.
Бұл петиция қоғамда үлкен талқылау тудырған оқиғалар аясында пайда болды. Бұған дейін бір бойжеткен мешітте ер адамның оған уақытша неке ұсынғанын айтып, оның жыныстық қатынасқа түсу ниеті болғанын жариялаған еді. Бұл жағдайды көпшілік талқылап, кейін қыздың өзін айыптағандар табылып, оның жалғыз жүруін күнә санап, әсіре діншілдер тарапынан сынға ұшыраған.