Қазақстанда цифрлық технологиялар құқық саласына белсенді түрде енгізілуде. Өңірлік коммуникациялар қызметінің баспасөз конференциясында Әділет департаментінің басшысы Балаим Кесебаева мәлімдегендей, Әділет министрлігі құқықтық қызметтердің сапасы мен қолжетімділігін арттыруға бағытталған «Digital Justice» бастамасы аясында бірқатар жобаларды жүзеге асыруда, деп хабарлайды aqshamnews.kz
Маңызды шешімдердің бірі – «E-ZanKomegi» бірыңғай құқықтық көмек көрсету ақпараттық жүйесін құру болды. Бұл жүйе қазірдің өзінде 1949 адвокат пен заңгерлік кеңесшілерді біріктіреді. 2023-2024 жылдары жүйе арқылы 88 738 іс өңделіп, портал қолданушыларының саны 6 749 адамға жетті.
Азаматтардың ыңғайлылығы үшін «Бейнеқоңырау» функциясы іске қосылды, бұл құқықтық қызмет операторларынан тәулік бойы кеңес алуға мүмкіндік береді. Бұған қоса, «Zan Komegi» мобильді қосымшасында жасанды интеллект элементтері бар чат-бот сынақтан өтуде. Жаңа ЖИ әрбір өтініштің ерекшеліктерін ескеріп, пайдаланушыларға жеке ұсыныстар береді.
«Әділет министрлігі заң қызметтерін көрсетуге арналған платформаларды әзірлейтін елдегі жетекші IT-компаниялар мен университеттер өкілдерінен жұмыс тобын құрды», – деп атап өтті Балаим Кесебаева.
Маңызды қадамдардың бірі – Қазақ ұлттық техникалық университетіне заңгерлік кеңес беру үшін жасанды интеллект әзірлеуге грант бөлу болды. Сондай-ақ, Халыққа қызмет көрсету орталықтарына (ХҚКО) ұқсас «заң клиникаларын» ашу жоспарлануда, онда азаматтар тегін заңгерлік көмек ала алады.
Сонымен қатар, әл-Фараби атындағы Қазақ ұлттық университетінің суперкомпьютері жасанды интеллект жүйесін Қазақстанның барлық аумағында енгізуге мүмкіндік береді, бұл азаматтарға заманауи құқықтық қызметтерді кеңінен қолжетімді етеді.