Үкіметтің жоспары.
Қазақстан Үкіметі 2025 жылға дейін 3 негізгі инфрақұрылымдық жобаны іске асыруды жоспарланып отыр, деп хабарлайды Almaty-akshamy.kz.
«Бүгінгі таңда еліміз бойынша өтетін транзиттік жүктердің шамамен 90% теміржол көлігімен тасымалданады. Дегенмен, әлеуеті одан да зор. Осы мақсатта теміржол көлігі саласында 2025 жылға дейін 3 негізгі инфрақұрылымдық жобаны іске асыруды жоспарланып отыр», - делінген Индустрия және инфрақұрылымдық даму министрлігінің баспасөз қызметінің хабарамасында.
Солардың біріншісі - «Достық-Мойынты» жобасы. Оны іске асыру Қытай мен Еуропа арасындағы транзиттік тасымалдар көлемін арттырады. Учаскенің өткізу қабілеті 5 есе ұлғайып, тасымал жылдамдығы тәулігіне 1500 шақырымға дейін жетеді.
«Дарбаза-Мақтаарал» жобасы Орта Азия елдеріне транзиттік қашықтықты қысқартып, қолданыстағы өткізу пункті арқылы Өзбекстанға аумағына шығуды қамтамасыз етеді.
Үшінші жоба - «Алматы станциясының айналма теміржол желісі». Ол Алматы торабына түсетін жүктемені 30% азайтып, жүктерді жеткізу уақытын 24 сағатқа дейін қысқартады.
Осы орайда теміржол көлігі саласында жылжымалы құрамды жаңарту бойынша шаралар қабылданып жатыр. Атап айтқанда, отандық вагон жасауды қолдау мақсатында өз елімізде шығарылған вагондарды сатып алуға кредит бергенде вагон операторлары үшін сыйақы мөлшерлемесін субсидиялау түрінде мемлекеттік қолдау көрсетіледі. Бағдарлама шеңберінде шамамен 3,5 мың фитингтік платформа және 2 мыңнан астам жүк вагоны сатып алынды. Сондай-ақ, биыл «Қазақстан темір жолы» 1,5 мың жүк вагонын сатып алуды жоспарлап отыр.
Жүк тасымалдарын одан әрі дамыту мақсатында министрлік отандық электровоздар (ALSTOM) мен тепловоздарды (ЛКЗ GE) сатып алғанда сыйақы мөлшерлемесін субсидиялау түрінде қолдауды заңнамалық түрде енгізуді ұсынады.