Ұлттық статистика бюросының мәліметі бойынша, Қазақстанда бүгінде 18 961 адам Абай есімін иеленген, – деп хабарлайды aqshamnews.kz тілшісі.
Олардың арасында 94 жастағы қарт Абай да бар. Ал биыл 91 сәбиге осы есім берілген. Бұл есім ең көп таралған өңірлер – Астана қаласы (2 186 адам), Түркістан облысы (2 008 адам) және Алматы қаласы (1 740 адам).
Ең қарт Абай
Қазақстандағы Абай есімді ең жасы үлкен адам 1932 жылы дүниеге келген.
Ал бұл есімді иеленгендердің ең көп бөлігін 30–34 жас аралығындағы азаматтар құрайды. Бұл жастағы Абайлардың саны 3 267 адамға жетеді.
Абай әлі трендте
Абай есімі қазір де сұраныста. 2026 жылдың алғашқы алты айында 91 нәрестеге Абай есімі қойылған.
Есім дәстүрлі түрде ер адамдарға тән болғанымен, Қазақстанда Абай есімді 9 әйел де тіркелген.
Ибраһим Абайдан да көп
Ақынның шын аты Ибраһим есімін иеленген тұрғындар да көп. Елде Ибраһим, Ибрагим және Ибрахим нұсқаларын қоса есептегенде, бұл есімді 37 844 адам алып жүр.
Ономастикадағы Абай
Ұлы ақынның есімі еліміздің географиялық атауларында кеңінен көрініс тапқан. Қазақстанда ақынның құрметіне бір облыс, бір қала, үш аудан және 26 ауыл аты қойылған.