Қазақстанда өнеркәсіптік кәсіпорындардың қоршаған ортаға тигізетін зиянын азайту мақсатында жаңа шаралар қолға алынып жатыр. Бұл туралы Үкімет отырысында Индустрия және құрылыс министрі Қанат Шарлапаев мәлімдеді, деп хабарлайды aqshamnews.kz
Министрдің айтуынша, Экологиялық кодекске сәйкес, 17 ірі өнеркәсіптік кәсіпорын ең үздік қолжетімді технологияларды (ЕҮТ) енгізуі қажет. Бұл технологиялар атмосфераға зиянды заттардың шығарындыларын азайтып қана қоймай, кәсіпорын қызметкерлерінің еңбек жағдайларын да жақсартуға мүмкіндік береді.
Бүгінде осы кәсіпорындардың бесеуі бағдарламаларын бекітіп, оны кезең-кезеңімен іске асыруды бастады. Сонымен қатар, биыл металлургия саласындағы тағы үш кәсіпорын өздерінің экологиялық бағдарламаларын қабылдауды жоспарлап отыр.
Өңірлердегі экологиялық жағдайды жақсарту үшін кәсіпорындар атмосфераға шығатын зиянды заттарды азайту бойынша белсенді жұмыс істеп келеді. Олар жыл сайын қалалар мен аудандарды көгалдандыруға және елді мекендерді абаттандыруға бағытталған іс-шараларға қатысып, табиғатты қорғау саласында әлеуметтік жауапкершілікті арттыруға атсалысуда.
Бұл шаралар қоршаған ортаны қорғау мәселелерінде оң өзгерістерге қол жеткізіп, өнеркәсіптік саланың тұрақты даму үлгісін қалыптастыруға ықпал етеді.