Өндіріс алаңында қосымша 40 жұмыс орны ашылған.
Қазақстанда жаңа өндірістік алаң іске қосылды. Бұл алаңда мамандар мұнай-газ жабдықтарын шығарады, деп хабарлайды Almaty-akshamy.kz.
«Павлодар қаласында «КазПромБезопасность» ЖШС мұнай-газ жабдықтарын шығаратын өндірістік алаң іске қосылды. Аталған жоба Индустрияландыру картасы шеңберінде жүзеге асырылды. Өндірістік алаңды құру мен дамыту шараларына 246 млн теңгеден астам қаржы инвестицияланған», - делінген Индустрия және инфрақұрылымдық даму министрлігінің баспасөз қызметінің хабарламасында.
Кәсіпорын жылу алмасу аппараттарын, конденсаторлар, ауаны салқындататын аппараттар, криогендік жабдықтар, құбыр бөлшектері мен құбырлардың көптеген түрлерін, түрлі металл конструкцияларын шығарады. Өндіріс орны өндірілетін тауар желісін одан әрі кеңейтуді жоспарлап отыр.
«КазПромБезопасность ПВ» ЖШС өндірістік алаңында жоғары сапалы өнімді дайындау үшін барлық талаптарға жауап беретін заманауи жабдықтар орнатылған.
Өндіріс алаңында қосымша 40 жұмыс орны ашылған. Алдағы уақытта кәсіпорындағы қызметкерлер санын 150 адамға дейін жеткізу жоспарда бар.