Бірақ кәсіпкерлік қызмет лауазымдық міндеттерін орындауға кедергі келтірмеуі тиіс.
Қазақстан Конституциясына сәйкес келмейтін кейбір заң нормалары жойылмақ. Тиісті заң жобасын бірінші оқылымда Мәжіліс депутаттары мақұлдады, деп хабарлайды aqshamnews.kz.
Құжатқа сәйкес, мемлекеттік функцияларды орындауға уәкілетті тұлғаларға кәсіпкерлікпен айналысу құқығына қойылған шектеу Конституцияға қайшы деп танылды.
"Яғни, мемлекеттік қызметшілерге теңестірілген тұлғалар енді кәсіпкерлік қызметпен айналыса алады. Оларға РМҚК, коммуналдық кәсіпорындар, коммуналдық мемлекеттік мекемелер, соның ішінде мектептер мен ауруханалардағы басқарушылық функцияларды жүзеге асыратын тұлғалар жатады. Бұлар – бірінші басшылар, олардың орынбасарлары, мемлекеттік сатып алу департаменттерінің басшылары, филиалдардың басшылары", – деді Мәжіліс депутаттарының алдында сөйлеген сөзінде Сыбайлас жемқорлыққа қарсы қызмет төрағасының орынбасары Ұлан Сарқұлов.
Алайда кәсіпкерлік қызмет лауазымдық міндеттерді орындауға кедергі келтірмеуі, қызметтік мүлікті пайдалануды туындатпауы және лауазымдық міндеттерімен мүдделер қақтығысына әкелмеуі тиіс.
Кәсіпкерлік қызметпен айналысуға қойылған тыйымды сақтап қалу ұсынылады:
▪ аумақтық сайлау комиссияларының тұрақты негізде өкілеттіктерін жүзеге асыратын мүшелеріне;
▪ Ұлттық банк қызметкерлеріне;
▪ Қаржы нарығын реттеу және дамыту агенттігі қызметкерлеріне;
▪ "Қазақстан авиациялық әкімшілігі" АҚ қызметкерлеріне;
▪ ұлттық холдингтер мен ұлттық компаниялардағы басқарушыларға;
▪ бюджеттен қаржыландырылатын жобаларды таңдау және сатып алу саласындағы бөлімшелерге