Еліміздің 20 жоғары оқу орнының базасында жасанды интеллект (ЖИ) бойынша мамандар даярлау бағдарламасы іске қосылды. Бұл туралы Президент Қасым-Жомарт Тоқаевтың қатысуымен өткен Үкіметтің кеңейтілген отырысында Премьер-министр Олжас Бектенов мәлімдеді.
Премьер-министрдің айтуынша, жасанды интеллект саласын дамыту «Болашақ» бағдарламасы арқылы да қолдау табуда. Бұл бағдарламаның аясында ЖИ саласына арналған жеке квота енгізілген. Сонымен қатар, Астанада Мемлекет басшысының тапсырмасымен Халықаралық жасанды интеллект орталығы ашылады.
Елімізде «AI-Sana» бағдарламасы іске қосылып, оның шеңберінде биыл 100 мың студент экономиканың әртүрлі салаларына жасанды интеллект енгізу бойынша қолданбалы дағдыларды меңгермек. Бұл бастама студенттердің тәжірибелік білімін арттырып, еңбек нарығында олардың сұранысын көбейтуге бағытталған.
Сонымен бірге Astana Hub инновациялық орталығы IT саласында табысты стартаптарды қолдауға және дамытуға арналған тиімді алаңға айналды. Қазіргі уақытта Astana Hub-та әлемнің түрлі елдеріне өнімдерін экспорттайтын 1,6 мыңға жуық IT-компания тіркелген.
Бұл шаралар Қазақстанның IT және жасанды интеллект саласын дамытудағы қарқынды қадамдарын көрсетіп, елдің заманауи технологиялық орталық ретінде қалыптасуына ықпал етпек.