Қазақстанда есту және сөйлеу қабілеті шектеулі жандардың өмірін арқау еткен тұңғыш толықметражды көркем фильм түсіріліп жатыр. «Тұяқ» деп аталатын туынды отбасы, кешірім, өзара түсіністік пен адамға берілетін екінші мүмкіндік туралы баяндайды, – деп хабарлайды aqshamnews.kz тілшісі.
Фильм ҚР Мәдениет және ақпарат министрлігі мен Ұлттық киноны қолдау мемлекеттік орталығының қолдауымен жүзеге асуда. Туындының продюсері – Батыр Сазаханов, қоюшы режиссері – Нұрғиса Әлмұрат.
Оқиға шағын ауылда анасы Мәрияммен бірге тұратын Сабыр мен Аман есімді ағайынды жігіттердің тағдырына құрылған. Үлкені Сабыр тумысынан есту қабілетінен айырылған. Соған қарамастан ол өз ісіне ұқыпты, талантты мал дәрігері. Ал інісі Аман ағасына үнемі қолғабыс етіп, еститіндер мен есту қабілеті шектеулі жандар әлемін жалғайтын сенімді дәнекерге айналған.
Ағайындылардың туған жерге деген сүйіспеншілік пен болашаққа құрған арманға толы мамыражай өмірі жиырма жыл бұрын із-түзсіз жоғалып кеткен әкесінің қайта оралуымен күрт өзгереді. Оның келуі ұмыт болған естеліктерді жаңғыртып, іште жиналған өкпе мен жауапсыз қалған сұрақтарды қайта қозғайды. Отбасының әрбір мүшесі өткеннің ащы шындығымен бетпе-бет келуге мәжбүр болады.
Режиссер Нұрғиса Әлмұраттың айтуынша, фильмнің басты мақсаты – ерекше жандарға аяушылықпен қарау емес, олардың ішкі әлемін, өмірді қабылдау ерекшелігін және қоғаммен қарым-қатынасын шынайы көрсету.
«Бұл – Қазақстандағы алғашқы осындай фильм. Біз олардың ішкі әлемін ашуға тырыстық. Олар дүниені қалай қабылдайды, қоғаммен қалай байланыс орнатады – осының бәрін көрсету маңызды болды. Фильмде отбасы құндылығы, әке мен бала арасындағы байланыс, жауапкершілік пен кешірім тақырыптары кеңінен көрініс табады», – дейді режиссер.
Картинада кәсіби актерлермен қатар есту және сөйлеу қабілеті шектеулі азаматтар да рөл сомдайды. Түсірілім тобы арнайы орталықтарда кастинг өткізіп, кейіпкерлерді сол жерден таңдаған. Авторлар мұндай шешім экрандағы табиғилық пен шынайылықты сақтау үшін қабылданғанын айтады.
Түсірілім барысында су мен жарық секілді көркем метафораларға да ерекше мән берілген. Бұл тәсіл арқылы көрерменге кейіпкерлердің ішкі күйі мен сезім әлемін тереңірек жеткізу көзделген.
«Тұяқ» – есту қабілеті шектеулі жандардың тағдыры арқылы отбасы, жады, айырылу, сенім және кешірім секілді маңызды тақырыптарды қозғайтын адамгершілік драма. Фильм кейде ең қастерлі сөздердің ешқандай дыбыссыз-ақ, үнсіздікте айтылатынын ұқтырады.