Қазақстанда ел-жерді аралап, шоу-бағдарлама қоятын цирктер мен жануарларды ұстап көруге мүмкіндік беретін кішігірім зообақтардың жұмысына түбегейлі тыйым салынды.
Мұндай шектеу көшпелі окенариум мен дельфинарийлерге де қатысты, деп хабарлайды aqshamnews.kz.
Енді жан-жануарлар мен балықтарды жүк көлігіне тиеп алып, айлап гастрольдік сапармен ауыл-аймақты аралай алмайды. Жаңа ережені елемегендерге қомақты айыппұл салынады. Экология министрінің мамандары "бұл норма ең алдымен қауіпсіздік үшін жасалып отыр" деді.
"Жылжылмалы цирктерде жануарларға тиісті жағдай көрсетілмейді. Өйткені мүмкін емес. Олар көшіп-қонып жүреді. Әртүрлі ауру таратуы мүмкін. Ауырып қалса, халықпен кездескен кезде адамдарға жұғуы мүмкін деген қауіптер бар. Сол себепті осындай норма енгізілді", - деді ҚР Экология және табиғи ресурстар министрлігі басқармасының бас сарапшысы Бақытжан Исахаев.
Ал егер бұл ережені елемей, өз бетінше саябақтар мен парктерде жануарларды ұстап жүріп қызмет көрсетсе немесе жекеменшігіндегі жануарлармен елді аралап, цирк ұйымдастырса, жеке тұлғаға 40 мың теңгеге жуық, ал заңды тұлғаға 100 мың теңгеден көп айыппұл салынады.
"Тексеретін арнайы орган жоқ. Ал егер арыз-шағым түсіп жатса, тиісті органдармен бірлесіп, тексеру жүргізуге болады. Әкімшілік немесе басқа да жауапкершілікке тартуға болады", - деді Бақытжан Исахаев.