Қазақстанда білім беру саласын дамыту мақсатында 217 жайлы мектеп пен 200 тірек мектептен тұратын жаңа білім беру желісі құрылады. Бұл туралы Премьер-министр Олжас Бектенов Үкіметтің кеңейтілген отырысында мәлімдеді, деп хабарлайды aqshamnews.kz
Жобаның басты мақсаты – үздік тәжірибелерді тарату арқылы барлық жалпы білім беру мекемелерінде білім сапасын теңестіру.
Сондай-ақ, 2025 жылға қарай кәсіптік-техникалық білім беру саласында 10 технологиялық көшбасшы колледж құрылып, олар ресурстық орталықтарға айналады. Бұдан бөлек, шетелдік жоғары оқу орындарының 23 филиалы жұмыс істеп жатқан елде биыл тағы 11 филиал ашылатыны белгілі болды.
Ғылымдағы жаңа жетістіктер:
Сәтбаев университеті Kazakhmys корпорациясының тапсырысы бойынша таза селен алу технологиясын әзірледі. Бұл өнім медицина, электроника және басқа да жоғары технологиялық салаларда қолданылмақ.
Назарбаев университетінің базасында тірек-қимыл жүйесі зақымданған адамдарға арналған экзоскелет өндірісі дамуда. Сертификаттаудан кейін экзоскелеттер Денсаулық сақтау министрлігінің тапсырысы бойынша шығарылатын болады.
Қазақстандық ғалымдар онкологиялық ауруларды емдеуге арналған жаңа препарат жасап шығарды. Препараттың клиникалық сынақтары жалғасуда, ал оны жыл соңына дейін тіркеу жоспарланып отыр.
Медицина саласындағы жетістіктер:
Премьер-министрдің айтуынша, ана мен бала денсаулығын жақсарту бағытында айтарлықтай жетістіктерге қол жеткізілген:
Бала шетінеу көрсеткіші 6,7%-ға, ана өлімі 11,4%-ға азайды.
Ауруларды ерте диагностикалау үшін скринингтік тексерулер 38%-ға кеңейтілді, бұл ретте 2,8 млн адам онкологиялық скринингтен өтті.
Қатерлі ісіктен болатын өлім-жітім көрсеткіші 3,5%-ға төмендеді.
Бұл жобалар мен жетістіктер еліміздің білім беру, ғылым және денсаулық сақтау салаларын жаңа деңгейге көтеріп, халықтың өмір сапасын жақсартуға бағытталған.