Қазақстанда полицейлер қоғамдық орындарда бет-әлпетті жасыратын киім киюге тыйым салатын жаңа заңнамаға енгізілген түзетулер бойынша түсіндіру жұмыстарын бастады, - деп хабарлайды Аqshamnews.kz Polisia.kz сайтына сілтеме жасап.
Полиция мәліметінше, бұл өзгерістердің мақсаты — қоғамдық қауіпсіздікті күшейту, тұлғаны анықтауды жеңілдету және қоғамдық тәртіпті сақтау. Сондай-ақ, жаңа ережелер азаматтардың құқығы мен бостандығын, соның ішінде діни сенімін бұзбайтыны атап өтілді.
Учаскелік инспекторлардың айтуынша, тыйым бет-әлпетті толықтай жауып, тануға кедергі келтіретін киімдерге – мысалы, маска мен никабқа қатысты. Ал хиджаб, шейла, химар, аль-амира және бетті жаппайтын өзге де киімдерге бұл шектеу қолданылмайды.
Ауа райының жағдайларына, медициналық қажеттілікке, заң талаптарын орындауға, қызметтік міндеттерге, сондай-ақ спорттық немесе мәдени іс-шараларға қатысу мен азаматтық қорғаныс қызметкерлерінің жұмысына байланысты жағдайларда бұл тыйымнан ерекшеліктер қарастырылған.
Түсіндіру жұмыстары аясында полицейлер азаматтарға құқықбұзушылықтардың алдын алу шаралары туралы да еске салды.
Еске салайық, бет-әлпетті жасыратын киім киюге тыйым салу туралы норма Қазақстан Республикасының "Құқық қорғау қызметін, құқық қорғау және арнаулы мемлекеттік органдар, азаматтық қорғау органдары мен әскери қызметшілердің тұрғын үймен қамтамасыз етілуі мен әлеуметтік қорғалуын жетілдіру, сондай-ақ ішкі істер органдары қызметіндегі артық заңнамалық реттеуді алып тастау мәселелері бойынша кейбір заңнамалық актілерге өзгерістер мен толықтырулар енгізу туралы" Заңына енгізілген болатын.
Бұл заңға 30 маусымда Президент Қасым-Жомарт Тоқаев қол қойды.