Қазақстан мектептерінде «100 медиативті мектеп» жобасы іске қосылды. Бұл бастама елдегі барлық білім беру ұйымдарында қауіпсіз және қолдаушы ортаны қалыптастыруға бағытталған. Жобаның басты мақсаты – қақтығыстарды тиімді шешіп, оқушылар, педагогтер және ата-аналар үшін жағымсыз салдардың алдын алу, деп хабарлайды aqshamnews.kz
Жоба аясында мектеп медиациясы қызметтері құрылып, бірегей әдістемелік ұсынымдармен қамтамасыз етілді. Ы.Алтынсарин атындағы Ұлттық білім академиясы әзірлеген ұсынымдар мектеп медиациясын ұйымдастырудың теориялық және практикалық материалдарын қамтиды. Бұл құжаттар мектептерде медиативтік практикаларды енгізуге негіз болып, медиативті қызметтердің тиімділігін арттырады.
Жобаның негізгі мақсаты – қиын өмірлік жағдайларда оқушыларға қолдау көрсету, отбасылық және мектепішілік дауларды шешу, сондай-ақ медиативтік әдістер арқылы оқушылардың даму мүмкіндіктерін арттыру. Сонымен қатар, мектептердегі психологиялық ахуалды жақсарту және даулы жағдайлардың санын азайту көзделген.
Медиация қызметтеріне әртүрлі әлеуметтік топтардың өкілдері тартылады, олар:
- Жоғары сынып оқушылары,
- Педагогтер мен педагог-психологтар,
- Әлеуметтік педагогтер,
- Ата-аналар,
- Үкіметтік емес ұйымдардың, қамқоршылық кеңестердің және аға ұрпақтың өкілдері.
ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова бұл жобаның маңыздылығын ерекше атап өтті. Оның айтуынша, медиативтік практика оқу орындарындағы психологиялық ахуалды жақсартып, оқушылардың әлеуметтенуіне ықпал етеді. Сонымен қатар, отбасылық-құқықтық дауларды шешуге жәрдемдесу және мектептердегі жалпы жағдайды жақсарту арқылы қоғамдағы бейбітшілікке үлес қосады.
Бұл жоба мектептердегі тәрбие жұмысын жаңа деңгейге көтеріп, оқушылар мен ата-аналардың арасындағы өзара түсіністікті нығайтуға септігін тигізеді. «100 медиативті мектеп» жобасы Қазақстанның білім беру саласында үлкен жаңалық болмақ.